Tuesday,January 23, 2018
  • :
  • :

अन्तरवार्ता

‘यो सरकारको विश्वसनीय विकल्प नेपाली काग्रेसको नेतृत्व नै हो’

‘यो सरकारको विश्वसनीय विकल्प नेपाली काग्रेसको नेतृत्व नै हो’


प्रमुख प्रतिपक्षी नेपाली काग्रेसका सभापति शेरबहादुर देउवा निकट नेता डा. प्रकाशशरण महतसँग नयाँ सरकार गठन, सरकारको नेतृत्व लगायतका विषयमा गरिएको कुराकानीको संक्षिप्त अंश ।
सरकारको विकल्प खोज्न सुरु गर्नु भएको हो ?
अहिले सरकारको विकल्प भन्दा पनि अहिले हामी प्रतिपक्षमा छौ र प्रतिपक्षको भूमिका निर्वाह गर्न चाहन्छौ । यो सरकार सबै क्षेत्रमा असफल भईसकेको छ । जनताको चासो, चिन्ता, आवश्यकताप्रति पुरै बेखवर छ । यो सरकार कुरा ज्यादा गर्छ काम कम गर्छ । यसो हुनाले यी विषयबस्तुहरुमा, राष्ट्रिय मुद्दाहरुमा, संविधान कार्यान्वयन, मधेस मुद्दामा सरकारले बार्ता टोली बनाएपनि काम अघि बढ्न सकेको छैन, भुकम्प पीडितहरु पीडित नै छन अत्यन्तै कष्टकर जीवन विताउन बाध्य छन । नाका खुलेको यति समय भईसक्यो, निर्याता आयातमा अहिले कुनै रोकटोक छैन तथापि ईन्धनको अभाव कायमै छ । कालोबजारी कायमै छ, ग्यासको अभाव त्यतिकै छ । जानीबुझीकन यो अभावलाई सरकारी संरचना मार्फत नै संस्थागत गरिएको छ । न्यायपालिका, कुटनीतिक नियोगमा ब्यापक राजनीतिकरण गर्ने अभियान सरकारले थालेको छ । मुलत ओली सरकार जनताको आवश्यकता, राष्ट्रिय आवश्यकता भन्दा पनि आप्mनो आवश्यकता, पार्टी, कार्यकर्ताको कसरी पक्षपोषण गर्ने, कसरी बढी भन्दा बढी पद सृजना गरेर भर्ति गर्ने मानसिकतामा मात्रै रहेको देखिएको छ ।
सरकारले राम्रो काम गर्न सकेन भनेपछि अबको विकल्प के त ?
हामीले यी कुराहरुलाई संसदमा शसक्त रुपमा उठाउँछौ । सरकारलाई खवरदारी गर्छौ । सरकारलाई सच्चिनकोलागि हामीले बहसलाई अगाडि बढाउछौ ।
तपाई सरकारलाई सच्याउन लाग्नु हुन्छ, परिवर्तन गर्न
होईन ?

यो सरकारलाई सच्याउन हामी कोशिस गर्छौ । तर हामीलाई के विश्वास छ भने सरकार सच्चिनेबाला छैन । जनताको लागि काम गर्ने मानसिकतामा यो सरकार छैन । कुरामात्रै ज्यादा गर्ने काम नगर्ने मानसिकतामा यो सरकार छ । अन्तोतगत्वा मलाई लाग्छ केपी ओलीको नेतृत्वमा जुन सरकार बनेको छ यसले विश्वास गुमाउँछ । यसले जनताको विश्वास त गुमाईसकेको छ ।
प्रमुख प्रतिपक्षी दल नेपाली काग्रेसलेपनि त केही गर्न सकेन ?
जनता र देशकोलागि काम गर्न सरकारमा पुगेका हुन । त्यही आश्वासन दिएर संसदको बहुमत लिएर सरकारमा पुगेका हुन । हामीले काम गर्न नसकेको कुराको खवरदारी गर्ने हो, काम गर भनेर दवाव दिने हो । जनता बाक्क दिक्क छन, जनतामा यो सरकारले विश्वास गुमाईसकेको छ अब संसदमा विश्वास गुमाउन बाँकी छ । मलाई लाग्छ, संसदमा पनि यसले चाडै विश्वास गुमाउँछ । यो सरकारले संसदमा विश्वास गुमाएको अवस्थामा अवश्य पनि विकल्प खोजिन्छ ।
तपाईहरु अहिले प्रचण्डलाई प्रधानमन्त्री बनाउने पक्षमा पुग्नु भएको हो ?
अहिले को प्रधानमन्त्री बन्ने भन्ने कुरा महत्वपूर्ण होईन ।
प्रचण्डले त सरकारको नेतृत्वकोलागि आफूलाई काग्रेसले प्रस्ताव गर्यो भन्नु भएको छ नि ?
त्यस्तो प्रस्तावको कुरा चाही मलाई थाँहा छैन । अहिले नेपाली काग्रेस सबैभन्दा ठूलो दल हो र अहिले प्रमुख प्रतिपक्षमा नेपाली काग्रेस छ । भोली यो सरकारको विश्वसनीय विकल्प भनेको नेपाली काग्रेस नै हो । काग्रेस नेतृत्वको सरकार नै हो । यो सरकारको विश्वसनीय विकल्पको आधारहरुसहित एउटा दिगो रुपमा भोली सरकार चल्ने पनि परिस्थिति निर्माण गर्नु पर्छ । यो निर्माण गर्ने दिनमा कसरी भोली राजनीति अगाडि बढ्छ त्यो हेर्न नै बाँकी छ । अहिले नै कस्तो सरकार बन्छ, कस्ले नेतृत्व गर्छ भनेर चर्चा गर्नु अलि परिपक्व हुदैन ।
त्यसो भए काग्रेस अझै द्धिविधा र अन्यौलग्रस्त अवस्थामा छ ?
हामी स्पष्ट छौ । अहिले हामी एउटा सशक्त प्रतिपक्षको भूमिका निर्वाह गर्न चाहन्छौ । संसदमा यो सरकारको गलत क्रियाकलाप, विदेश नीतिमा असफल, मित्र राष्ट्रहरुलाई पनि आप्mनो कुरा बुझाएर विश्वासमा लिन नसकेको, अन्तर्रा्ष्ट्रिय मञ्चमै जुन टिकाटिप्पणी भईरहेको छ यी तमाम विषयहरुलाई हामी उठाउछौ र संसदभित्र पनि एउटा बातावरण बन्छ यो सरकारको विपक्षमा । जनताको विचमा त्यो बातावरण बनिसकेको छ । अहिले नै हामीले यस्तो गर्छौ, उस्तो गर्छौ भनेर भनिरहन आवश्यक छैन ।
त्यसो भए तपाईहरुले एमाओवादीको नेतृत्वमा सरकार गठन गर्ने निर्णय गर्नु भएको छैन ?
अहिले हामी शसक्त प्रतिपक्षको भूमिका निर्वाह गर्छौ । जनताको आवश्यकता, जनताको चासो र चिन्ता र राष्ट्रिय मुद्दालाई उठाउछौ । संविधान कार्यान्वयनकोलागि अब धेरै समय बाँकी छैन तर यो सरकारले केही गरिरहेको छैन । यी तमाम विषयमा हामीले स्पष्ट ढंगले आप्mनो कुराहरु राख्छौ । यो बजेटको विषयमा पनि योसरकारले सस्तो प्रचारबाजी गर्ने, दिगो विकासलाई बेवास्ता गर्ने, बजेट पार्टीमुखी बनाउने, पार्टी करण गर्ने जुन मानसिकतामा यसले काम गरिरहेको छ त्यस विषयमा पनि हामीले खवरदारी गर्छौ । मलाई लाग्छ समग्रमा यो सरकारले जुन गलत काम गरिरहेको छ, गैरजिम्मेवार भईरहेको छ, जनताको चासो र चिन्तामा सरोकार राखिरहेको छैन यही कारणले यो सरकारमा अहिले जुन पार्टीहरु छन उनीहरुवीच विरोधाभाष बढ्दै जान्छ, अविश्वास बढ्दै जान्छ र स्वभाविक रुपमा यसले आफै विश्वास गुमाउँछ । त्यसो हुनाले हामीले यसमा धेरै कसरत गरिरहनु पर्दैन ।
यो सरकार ढल्ला तर अर्को सरकार कस्को नेतृत्वमा बनाउने त ?
मलाई लाग्छ पहिला यो सरकारले संसदको विश्वास गुमाईसकेपछि गर्ने कुरा हो । विश्वास गुमाउने परिस्थिति बन्यो, यो सरकारमै रहेको एमाओवादी जसको आधारमा यो सरकार टिकेको छ । एमाओवादीका नेतृत्वले पनि हामी सन्तुष्ट छैनौ, हामी काधमा बोेकेर हिडिरहन सक्दैनौ भनि अभिब्यक्ति दिईरहेको छ । त्यस परिवेशमा आप्mनै बोझले यो सरकार विफल हुन्छ । त्यो अवस्थामा कसरी एउटा दिगो ढंगबाट विकल्पमा जाने भन्ने कुरा सोच्ने हो । अहिले हामीले यसमा धेरै चिन्ता गरिरहन पर्दैन ।
त्यसो भए तपाईहरु प्रचण्डलाई प्रधानमन्त्री बनाउन तपाईहरु अझै पनि तयार हुनु भएको छैन ?
मलाई लाग्छ अहिले त्यो स्थिति आएकै छैन । सरकारभित्रकै कन्ट्रा डिक्सनले यो सरकार आफै विश्वास गुमाउने अवस्थामा पुग्छ, यसको क्रियाकलाप जनमुखी छैन । राष्ट्रिय मुद्दाप्रति संबेदनशिल छैन । जनताका आवश्यकताप्रति संबेदनशिल छैन । भ्रष्टाचार, महंगी, कालोबजारी जुन ब्याप्त छ त्यसलाई सरकारले नै प्रोत्साहन गरिरहेको छ । भुकम्प पीडितका पुनःनिर्माणका जुन आवश्यकताहरु छन वर्षा लाग्न लागिसक्यो, अहिले पनि कुरामात्रै गर्छ काम गर्दैन । त्यो संयन्त्रमा पनि कसरी बढी भन्दा बढी आप्mना मान्छेहरु पठाउने भन्ने मानसिकतामा ओली सरकार काम गरिरहेको छ । त्यसकारण योसरकारमा रहेका दलहरु पनि खुसी छैनन । माओवादी पनि खुसी छैन । त्यसकारण यो सरकार विफल हुने निश्चित छ । केही समयको कुरा मात्रै हो । त्यसपछि विकल्प अगाडि बढ्छ तर अहिले नै त्यो गर्नु भन्दा पनि अहिले हामी यो सरकारका असफलताहरु, यो सरकारले गर्नु पर्ने कामहरु, निर्वाह गर्नु पर्ने जिम्मेवारीहरु प्रति हामीले खवरदारी र ध्यानआर्कषण गर्ने हो ।
प्रचण्डले बालुवाटारको बैठकमा प्रधानमन्त्रीलाई काग्रेसले आप्mनो नेतृत्वको लागि प्रस्ताव गरिसकेको बताएपछि तपाईहरुले होईन भन्न मिल्छ ?
उहँले के भन्नु भयो त्यो मलाई थाहाँ छैन । बर्तमानमा हाम्रो जे कर्तब्य छ, जिम्मेवारी छ, जुन ठाँउमा हामी छौ त्यो कर्तब्य र जिम्मेवारी नेपाली काग्रेसले गंभिरताकासाथ निर्वाह गर्छ । त्यसपछि कसरी यो राजनीतिक घटनाक्रम अघि बढ्छ, कसरी यो सरकारले विश्वास गुमाउँछ त्यो त हेर्न बँकी नै छ । त्यसपछिका कुरा त्यसपछि हुन्छन ।
सरकारलाई नीति तथा कार्यक्रम ल्याउन नदिने रणनीतिमा तपाईहरु हुनु हुन्छ ?
अहिले ल्याउन दिने नदिने भन्दा पनि सरकार पहिला छलफल नै नगराई सिधै संसदमा नीति तथा कार्यक्रम र बजेट ल्याएर पास गराउने तयारीमा थियो । राष्ट्रिय मुद्दा जनताको सरोकारमा छलफल गर्न चाहदैन थियो । हामी यस विषयमा कडा रुपमा प्रस्तुत भएपछि बल्ल उहँहरु छलफल गर्न तयार हुनु भएको छ । हामी अहिले यी विषयहरुलाई संसदमा उठाउँछौ । यसमै हामी केन्द्रीत हुन्छौ ।

आफ्नो मत व्यक्त गर्नुहोस्

अन्य समाचार...